【 赛高 影评 】《 尸杀半岛 》令我谂起最后生还者PartII

《 尸杀半岛 》令我谂起最后生还者PartII

实在唔怕讲,《 尸杀半岛 》「同第一集差好远」嘅评价一早就喺网络上涌现,香港嘅观众都应该有晒心理準备,至于「好远係几远」,好睇你对上集《尸杀列车》嘅感觉。假如《尸杀列车》喺你心目中係一部「神作」,咁,《 尸杀半岛 》都几大镬。又唔使惊住,我觉得《 尸杀半岛 》只係畀《尸杀列车》嘅包袱压住咗啫。拎开个包袱,《 尸杀半岛 》都尚算可以令人接受嘅,当一般 popcorn 动作片嚟睇嘅话。

上集做得好嘅地方喺边度

《尸杀列车》好睇,好睇在故事扣人心弦。唔似得一般美式丧尸电影以冲锋陷阵打丧尸为故事主线,着眼于打打杀杀同喷血喷得有几咁精彩,《尸杀列车》係借几位主角喺列车上一个咁狭窄嘅环境下求生嘅故事,刻划人情冷暖,有好多比血肉横飞嘅厮杀更令人冲击嘅画面。《尸杀列车》製作上的确唔够完善,但赢剧情铺排,赢气氛,对于一部电影嚟讲,好重要。

今集做得唔好嘅地方係边度

《尸杀半岛》,调返转,budget 多咗,故事focus 转咗,导演想讲嘅 message 唔同咗(话上一集太绝望,所以今次要多返啲希望),本来都有 potential 可以拍得好好睇;结果,故事规模越大,场景空间越大,剧情反而变得乏味,好想拍一部「猛片」,偏偏唔够「猛」。《尸杀列车》孔刘、马东石等等令观众有共鸣,相反《尸杀半岛》姜栋元、李贞贤同观众嘅距离有啲遥远。男女主角冷面特工上身,枪法如神,但係就未能够做到有血又有肉嘅感觉,同好多动作片只係得个打字嘅主角无咩分别。剧情上多次想表现出佢哋两个都有脆弱嘅一面(主要係为咗亲情),不过似乎计算得太过精準,公式化剧情铺排得太过明显。亦都唔可以唔提,角色与角色之间嘅互动欠缺张力,人类反派有头威无尾阵,而男女主角喺故事里面有一个明明好重要嘅「渊源」,可惜无被发展成为「冲突」(当然唔係讲打交个一款冲突啦),错失咗一个可以令男女主角真真正正有意义咁去互动嘅良机。

特效有进步定係退步

《尸杀列车》印象令我最深刻嘅竟然係一开始身体劲柔软嘅嗰一只马(咦,sorry,係鹿啊),翻身嘅动作做得劲靓(唔係讲笑,我係真心 impressed),不过另有一幕爆玻璃跌丧尸又假得令我打咗个突。上一集无乜需要用CG,今集《尸杀半岛》,重点变咗追逐战、枪战,用 CG 嘅频率高咗(亦都几高),特效应用嘅好与坏变得更加明显,例如飞车狂撞丧尸嘅画面,丧尸唔係血肉模糊,而係,真係有啲模糊。其实韩国电影人处理 CG 嘅技巧係越嚟越好㗎,不过可能去到某啲突破唔到荷里活水平嘅关口,只好用掩眼法去解决问题,咁样就难逃资深观众嘅法眼啦。

令我谂起最后生还者PartII

《尸杀半岛》唔可以话係难睇,亦都无令我反感,所有嘢都係中规中矩,只不过缺点比较明显,结局有啲「出事」(剧情同对白太刻意、情感太浮夸、某个演员嘅演技太⋯⋯出位,气氛令人难以言喻),然后再畀上一集《尸杀列车》广泛嘅赞誉拖累,一切一切都无办法唔令我联想起《The Last of Us Part II》。一部係电影,一只係游戏,两个末世故事作品都係期待值劲高嘅续集,除咗丧尸/感染者都已经沦为「识郁嘅布景」之外,亦都因为编导想作出一啲「新尝试」而弄巧反拙。好彩嘅係,《尸杀半岛》剧情上无乜争议,输都只係输「做得唔够好」而唔係「不知所谓」。

文:灵光

0
分享到:

评论0

请先

没有账号? 忘记密码?