【 赛高 影评 】《 新异变人 》又唔係话难睇嘅

《 新异变人 》又唔係话难睇嘅

多灾多难嘅《 新异变人 》终于上映(要强调,係上映咗),故事竟然係发生喺《卢根》时期,有啲 surprise,而更 surprise 嘅係,本来以为已经断咗尾嘅一条《变种特攻》电影系列伏线再度蒲头。当然啦,係咪「假阳性」,都要睇 Marvel Studios 嘅决定同观众嘅反应。我自认係一个好理智嘅 X-Men 影迷。《 新异变人 》对我嚟讲,剧情、製作或者演出上都无致命嘅问题,唯一问题其实出喺导演身上,想 crossover 超级英雄电影同恐怖电影,最后失败。

普普通通

《变种特攻:黑凤凰》可能係你睇完之后会好想闹爆佢嘅《变种特攻》正传电影,而《新异变人》只係你睇完之后对佢无咩感觉嘅《变种特攻》外传。《 新异变人 》嘅人设同背景其实都好吸引,部分演员(例如 Anya Taylor-Joy)嘅演出又唔差,可惜故事推进无乜惊喜。电影有太多主题想讲,包括青少年嘅反叛、克服内心恐惧等等,全部都係流于表面,无好深入嘅探讨。五位主角各有各恐惧,但係电影表达唔到呢啲恐惧真正对佢哋嘅人生构成咗啲咩重大嘅影响。

违反商品说明条例

导演 Josh Boone 希望《 新异变人 》创新,成为一部「超级英雄恐怖片」,但係要悬疑无悬疑,要惊吓无惊吓,结果《新异变人》只係另一部平平无奇嘅超级英雄电影。当日传出电影公司要求《新异变人》向《小丑回魂》等等爆红嘅三级恐怖电影借镜,要嚟个「massive reshoot」,最后 Josh Boone 坚持话「绝对无重拍」。正常电影公司出手影响导演决定都唔係啲咩好嘢,不过今次可能係例外,唔明 Josh Boone 坚持啲咩,真係觉得而家呢个「初衷」好正好成功?我自己本身就好怕睇恐怖片,但係睇《 新异变人 》嘅时候我连一个冷震都无打过。

又唔係话难睇嘅

无期望,就无失望。故事规模细唔一定係超级英雄电影嘅死穴,好似《死侍》咁样都可以拍出新颖有趣嘅风格。唔代表超级英雄电影唔可以玩青少年题材或者恐怖元素,只係《 新异变人 》做唔到咁解。不过要超越新生嘅《神奇4侠》同埋(well,都算係新生嘅)《变种特攻:黑凤凰》,《新异变人》真係完全未够班呢⋯⋯啊,可以至少移植 Magik 过去 MCU 吗?

文:灵光

0
分享到:

评论0

请先

没有账号? 忘记密码?