【 赛高 影评 】《 幻爱 》高先三宝中最推荐的一部

《 幻爱 》高先三宝中最推荐的一部

高先三宝之三,终于睇晒三宝!三宝嘅评价大约係: 幻爱 >金都>叔叔。《 幻爱 》无论演员、剧情、摄影皆为上品,但讲易入口嘅话会係《金都》,《 幻爱 》题材上沉重少少。电影讲述一名精神病康复者追寻爱情嘅故事,对象疑幻似真。到真係遇上爱情嘅时候,又碍于好多嘢而无办法好好走下去,有时「有问题」嘅,未必只係有精神病嘅一方。

好欣赏故事同角色设定!编剧非常出色!特别深刻嘅係写精神病患者会有录音听回放呢个习惯,呢个设定好细心,嵌入故仔度都嵌得perfect池!精神病康复者有缺憾,但所谓正常人都会有缺憾(甚至制度都係),都会伤害到人。所以套戏唔係讲有精神病几惨几惨,而係想带俾观众睇睇男女主角不完美嘅爱情。

尾段男女主有一幕高潮戏份,同朋友讲起,大家都觉得演得好好。《幻爱》个故仔推进得好好,场高潮戏都令观众好投入,出嚟嘅效果自然好好多。

我觉得香港电影评论学会颁最佳男女演员俾刘俊谦、蔡思韵简直公道!刘俊谦演有情爱妄想嘅精神病康复者,该正常时正常,该病发时病发(咩形容嚟),甚具爆发力!演出男主对自己病情嘅一股无可奈何。蔡思韵充分掌握女主嘅性情转变,仲要演埋「欣欣」,我谂新生代演员无乜人挑战过咁样嘅角色演出,而出嚟个表现都令人好满意!希望可以越多越多香港观众认识佢,同埋可以有更多担大旗嘅角色俾佢。

至于鲍起静同潘灿良,基本上唔驶多讲,虽然戏份不多,但胜在演咩似咩,真係老戏骨。特别係鲍姐喺《金都》先演完师奶仔,《幻爱》就演专业人士,角色分别好大,但又演得好好。Ush!我无收佣呀但大推大家课金睇呢套港产片!

文:sowhatmovie

0
分享到:

评论0

请先

没有账号? 忘记密码?